தமிழ்த் தேசியக் கூட்டமைப்பு உறுப்பினர் எம்.ஏ.சுமந்திரன், அநுரகுமார திஸாநாயக்க தலைமையிலான அரசாங்கத்துடன் இணைந்து செயற்படுவதில் தமிழ்த் தேசியக் கட்சிக்கு எவ்வித ஆட்சேபனையும் இல்லை எனத் தெரிவித்துள்ளார்.
ஊடகங்களுக்கு கருத்து தெரிவித்த முன்னாள் நாடாளுமன்ற உறுப்பினர் சுமந்திரன், அண்மைய பல கூட்டங்களில், அரசாங்கம் வழங்கும் அமைச்சுப் பதவிகளை ஏற்றுக்கொள்ளக் கூடாது என்ற கருத்து நிலவுவதாக தெரிவித்தார்.
நிரந்தர அரசியல் தீர்வு கிடைக்கும் வரை மத்திய அரசில் இணையக்கூடாது என்ற கருத்தும் நிலவியது.
எவ்வாறாயினும், அது தமிழ்த் தேசியக் கூட்டமைப்பின் கொள்கையல்ல என்று சுட்டிக்காட்டிய சுமந்திரன், அரசாங்கம் ஒத்துழைப்பை வழங்கினால் அதுபற்றி பரிசீலிக்கப்பட வேண்டும் என்றும் குறிப்பிட்டார்.
அமைச்சுப் பதவிகளுக்காக தமிழ்த் தேசியக் கூட்டமைப்பு எந்தவொரு நடவடிக்கையிலும் ஈடுபடாது எனத் தெரிவித்த தமிழ்த் தேசியக் கூட்டமைப்பின் முன்னாள் எம்.பி., பயனுள்ள வேலைத்திட்டம் முன்வைக்கப்படும் போது அனைவரும் ஒன்றிணைந்து முன்னோக்கிச் செல்ல வேண்டும் என்றார்.
“அரசியல் தீர்வு உட்பட எமது மக்களின் அடிப்படைத் தேவைகளுக்கு அவர்களுடன் கலந்துரையாடி தீர்வுகளை பெற்றுக்கொள்ள முடியும். அதேவேளை, மோசடி மற்றும் ஊழலுக்கு எதிராக ஒன்றிணைந்து செயற்படுவோம் என நம்புகின்றோம்” என அவர் மேலும் தெரிவித்தார்.
